Aug 17 (Jowhar)-Madaxweyne Donald Trump ayaa ku hanjabay inuu duqeyn doono dalka Cumaan oo xulafo la ah Mareykanka,haddii uu caqabad ku noqdo wadahadallada ay maamulkiisu la leeyihiin Iran, sida ay ku warrantay shabakadda Fox News.
“Haddii Cumaan ay caqabad nagu noqoto, si xun ayaan u duqeyn doonnaa.”ayuu u sheegay Trump warbaahinta Fox News.
Trump ayaa hanjabaadiisa u jeediyay Cumaan ka dib markii Iiraan ay Isniintii hore sheegtay in labada dhinac ay gaareen heshiis ku saabsan in maraakiibtu ay maraan marin biyoodka.
Wariye ka tirsan shabakaddaas ayaa sheegay in madaxweynaha Mareykanka uu hadalkaas ku sheegay wada-hadal khadka taleefanka ah oo dhacay maanta, wuxuuna sidoo kale sheegay in Mareykanku uu xiriir toos ah oo qarsoodi ah la leeyahay Ciidanka Ilaalada Kacaanka Islaamka ee Iran (IRGC).
Kooxda IRGC ayaa beenisay inay ku lug leedahay wadahadallo ay la yeelanayso Mareykanka.
Hase yeeshee, mas’uuliyiin u dhashay Iran ayaa sheegay inay ku dhow yihiin inay heshiis kama dambeys ah la gaaraan Cumaan oo ku saabsan maraakiibta maraysa marinka Hormuz.
Dhanka kale, heshiis-fahamka (MoU) oo soconayay muddo 60 maalmood ah ayaa ku eg maalinta Isniinta.
Heshiis-fahamkaas wuxuu ahaa ballan-qaad ay kala saxiixdeen Mareykanka iyo Iran si loo sii wado wadahadallada loona gaaro heshiis kama dambeys ah.
Dalka Cumaan, oo sheegta inuu yahay dal dhexdhexaad ka ah khilaafkan, ayaa wajahay dhowr weerar oo uga yimid dhanka Iran tan iyo markii uu khilaafku billowday.
Si kastaba ha ahaatee, hadda waxay door ka qaadanayaan wadahadallada lala yeelanayo Iran si dib loogu furo marinka biyaha.
Tan iyo markii Mareykanka iyo Israel ay weerareen Iran bishii Febraayo, Tehran ayaa inta badan xirtay marinkaas biyaha ee muhiimka ah.kaas oo ay badanaa maraan qiyaastii shan meelood meel (20%) shidaalka iyo gaaska dabiiciga ah ee dareeraha ah ee caalamka.
Dib-u-furidda marinkaas ayaa ahayd qodob muhiim ah oo laga wada-hadlayo.Afhayeen u hadlay IRGC ayaa beeniyay sheegashada Trump taas oo lagu sheegay isla wareysigaas ee ahayd in Mareykanku uu ku lug lahaa wadahadallo qarsoodi ah oo lala yeelanayay IRGC, taas oo ah awood weyn oo dhanka milatariga, siyaasadda iyo dhaqaalaha ah gudaha Iran.
Afhayeen ayaa u sheegay wakaaladda wararka ee Iiraan ee Tasnim News—oo ah mid si dadban ula shaqeysa dowladda sidan: “Wax wadahadal ah kama socdaan saraakiisha Ciidanka Ilaalada Kacaanka Iiraan (IRGC) iyo Mareykanka, beentaas uu Trump sheegayna waa uun riyooyin iyo mala-awaal ka dhashay jahawareerka iyo riyo-xumada uu la kulmay natiijada guuldarada iyo quusta uu kala kulmay dagaalka.”
Waxa uu Afhayeenka wasaaradda arrimaha dibadda Esmaeil Baghaei ayaa u sheegay wariyeyaasha Tehran “isfaham laga gaaray khariidadda waddada gaadiidka”.
Bayaankiisa, ayaa wuxuu sheegay in labada dhinac ay dhameystiri doonaan faahfaahinta ka hor inta aysan soo saarin bayaan wadajir ah. Cumaan ayaa hore ugu tilmaantay wadahadalladan kuwo wanaagsan.
Horraantii bishan, Wasiirka Arrimaha Dibadda ee Iiraan Abbas Araghchi ayaa sheegay in dib u furista buuxda ay ku xiran tahay in Iiraan ay magdhow ka hesho Mareykanka waxa Tehran ay ku tilmaantay jebinta Heshiiska Is-afgaradka.
