Aug 07 (Jowhar)-Ugu yaraan toddobo qof ayaa la dilay, 23 kalena waa la dhaawacay ka dib markii wiil 14 jir ah uu rasaas ka furay guriga uu ku noolaa iyo dugsigiisa oo ku yaalla duleedka caasimadda Thailand ee Bangkok.
Wiilkan hubeysan oo ah arday wax ka dhigta iskuulkiisa oo ku yaal Debsirin ee Nonthaburi dadka uu diley waxaa ka mid ahaa awoowgiis iyo ayeeyadiis iyo shan macallin ka hor inta uusan is-dilin, sida uu weriyeyaasha u sheegay Ra’iisul Wasaare ku-xigeenka Thailand Anutin Charnvirakul.
Sagaal ka mid ah dadka dhaawacmay ayaa xaaladdoodu aad u liidataa, sida ay sheegeen mas’uuliyiinta dalka Thailand .
Dhacdadan rasaasta ah –oo ah tii labaad ee ka dhacda dugsi ku yaalla Thailand sanadkan ayaa dib u soo celisay cadaadiska saaran dowladda si ay tallaabooyin adag uga qaaddo xakamaynta hubka.
Ra’iisul wasaare ku-xigeenka ayaa sheegay in weerarkaas uu ahaa mid si wanaagsan loo qorsheeyay balse lama oga ujeedada ka dambeysay weerarka uu geystey wiilkan.
Baaritaannada ayaa socda, iyadoo la arkay saraakiil sita qalab kombiyuutar iyo sanduuqyo guriga uu ninka toogashada geystay la degenaa awoowayaashiis, kuwaas oo uu toogtay ka hor inta uusan iskuulka weerarin. Weeraryahanka ayaa la noolaa awoowayaashiis maadaama waalidkiis ay kala tageen.
Aabaha iyo hooyadaba waxaa loo yeeray si su’aalo looga weydiiyo saldhig boolis oo maxalli ah Jimcihii dambe.
Dugsiga Debsirin, oo laga aasaasay Bangkok 1885, waa mid ka mid ah dugsiyada sare ee ugu sarreeya Thailand oo leh laamo dalka oo dhan ah. Waxaa loo tiriyaa dad badan oo caan ah oo reer Thailand ah oo ka qalin jabiyay jaamacadda, laga bilaabo diblomaasiyiin iyo ciyaartoy ilaa dhowr ra’iisul wasaare.
