Dagaal markale ka qarxay maanta caasimada Suudaan ee Khartoum
July. 02 (Jowhar.com)-Dagaal ba’an oo u dhaxeeya ciidamada Suudaan iyo xoogaga RSF ayaa dib uga qarxay dhanka waqooyi ee magaalada Khartoum barqanimadii maanta.
Dadka aagga ku sugan ayaa sheegaya in RSF ay isku dayday in ay weerarto fariisimaha ciidamada Suudaan, iyadoo halka dagaalka uu ka bilowday ay ku dhowdahay saldhig ciidamada cirka ah oo ay ka duulaan diyaaradaha dagaalka ee ciidamada dowlada Sudan.
Duqeymo dhanka cirka ah ayaa laga bilaabay qeybo ka mid ah waqooyiga caasimadda,waxaana dhanka bari ee magaalada loo adeegsaday madaafiic culus.
“RSF waxa ay sheegtay in ay ku soo riday diyaarad dagaal oo ay leeyihiin ciidamada Sudan gudaha degmada Baxri,” ayay tiri weriye u soo waranta taleefishinta Aljazeera. Bahri, oo sidoo kale loo yaqaan Khartoum North, waa mid ka mid ah saddexda degmo ee ka kooban tahay Khartoum Weyn.
Dagaallada tan iyo 15-kii Abriil dhexmaray ciidamada daacadda u ah madaxa ciidamada Abdel Fattah al-Burhan iyo RSF ayaa lagu dilay ku dhawaad 3,000 oo qof.
2.2 milyan oo kale ayaa lagu qasbay inay ka qaxaan guryahoodii gudaha dalka iyadoo ku dhawaad 645,000 ay u carareen xudduudaha si ammaan ah, sida uu sheegay Ururka Caalamiga ah ee Socdaalka.
Ugu yaraan 25 milyan oo qof oo ku nool Suudaan ayaa u baahan gargaar bini’aadantinimo iyo ilaalin, sida ay sheegtay Qaramada Midoobay.
Marka laga soo tago caasimadda, dagaalladii ugu xumaa ayaa ka dhacay galbeedka gobolka Daarfuur halkaas oo dadka deegaanka iyo sidoo kale Qaramada Midoobay, Maraykanka iyo kuwa kale ay sheegeen in dadka rayidka ah lagu bartilmaameedsaday laguna dilay qowmiyada ay ka soo jeedaan RSF iyo malleeshiyaadka Carabta ee isbaheysiga ah.
Dagaalku waxa uu burburiyay kaabayaashii dalka ee markii horeba jilicsanaa, isaga oo dadka deegaanka ka dhigay biyo iyo koronto la’aan. Xabad joojin badan, oo ay ku jiraan qaar ay ka wadahadleen Mareykanka iyo Sacuudi Carabiya, ayaa ku guuldareystay inay dhaqan galaan.
Dagaalka ayaa socday intii lagu guda jiray fasaxa Ciidul Adxaa ee hadda soo idlaaday, kaasi oo dhinacyada dagaallamaya ay ku dhawaaqeen xabad joojin gaar ah oo hal dhinac ah.
