Kenya oo sheegtay waqtiga ay ciidamadeeda kala baxayso Soomaaliya
Oct 04 (Jowhar.com)-Wasiirka Difaaca Kenya Aadan Ducaale ayaa sheegay in Ciiddanka Kenya (KDF) ay ka bixi doonaan Somalia marka la gaaro December 2024-ka, markaasoo dhammaan Waddamada ku yaboohay Hawlgalka Nabad-ilaalinta ay ka bixi doonaan Somalia.
Ducaale, oo ka soo hor muuqday fadhiga guud ee senate-ka si uu uga jawaabo su’aalaha senatarada, ayaa sheegay in ka bixitaanka ciidamada KDF ay ku xiran tahay dhowr arrimood oo ay ka mid yihiin horumarka howlgalka Midowga Afrika ee Soomaaliya (ATMIS) iyo xaaladda amni iyo siyaasadeed ee dalka ka jirta.
Waxa uu u sheegay Senatka in uu socdo istaraatiijiyad dhimista ATMIS, kaas oo ujeedkiisu yahay in si tartiib tartiib ah mas’uuliyadaha amniga loogu wareejiyo Ciidamada Ammaanka ee Soomaaliya.
” Kenya iyo dalalka kale ee ay ciidamada ka joogaan Soomaaliya iyo saaxiibada caalamiga ah, waxay si firfircoon ugu hawlan yihiin sidii ay ciidamada Soomaaliya uga taageeri lahaayeen tayaynta. si loo xaqiijiyo kala-guurka fudud.”ayuu yiri Ducaale
“Durba, wejigii 1-aad ee dhimista ayaa la soo gabagabeeyay iyadoo guud ahaan 2,000 oo askari oo ATMIS ah ay ka baxeen, iyadoo Kenya ay hoos u dhigtay 400 oo askari marka la gaaro Juun 2023. Wajiga 2 ee dhimista, ayaa markii hore la qorsheeyay in la soo afjaro Sebtember 30, 2023, si kastaba ha ahaatee, tani Farsamo ahaan waa la hakiyay iyadoo la sugayo go’aanka Midowga Afrika iyo Qarammada Midoobay ee ku aaddan codsigii dowladda Soomaaliya ee ahaa muddo kordhin saddex bilood ah,” ayuu yiri Ducaale.
Wasiirka Difaaca Kenya ayaa sidoo kale sheegay in Kenya ay qorsheynayso inay kala baxdo dalkaSoomaaliya ciidamo gaaraya 754 askari wajiga 2-aad iyadoo wajiga 3-aad uu bilaabanayo 1-da Oktoobar ilaa 30-ka June 2024, halkaasoo wadar ahaan ay ku bixi doonaan. 4,000 oo askari.
Waxa uu Senedka u sheegay in qoysaska saraakiisha KDF ee ku dhinta shaqada Kenya ay helaan lacag dhan 4 milyan oo Shillinka Kenya ah.
Ducaale ayaa sheegay in ku lug lahaanshaha Kenya ee dadaallada nabadeed ee Soomaaliya ay sahashay in la gaarsiiyo gargaar bini’aadinimo sidaa darteed ay meesha ka saartay dhibaatada kumanaan qoys, taasoo u sahashay qaxooti badan iyo dad gudaha ku barakacay in ay dib ugu laabtaan dalkooda iyagoo horumar ka sameeyay soo celinta hay’adaha dowliga ah ee dalka Geeska Afrika.
