Nov 02(Jowhar)-Madaxweynaha Colombia Gustavo Petro ayaa amray in dalkiisa laga saaro dhammaan diblomaasiyiinta Israa’iil, kaddib markii la xiray laba muwaadin oo reer Colombia ah oo saarnaa doonyo (flotilla) isku dayayay inay gargaar bani’aadamnimo geeyaan magaalada Gaza oo go’doon ku jirta.
Manuela Bedoya iyo Luna Barreto waxay ka mid ahaayeen shaqaalaha Global Sumud Flotilla – oo ah dadaal caalami ah oo lagu jabinayo go’doominta Israa’iil si loo gaarsiiyo gargaar Gaza. Sida uu sheegay ururka Global Movement to Gaza, ciidamada Israa’iil ayaa si sharci-darro ah u xirey labadan haween.
Madaxweyne Petro ayaa bartiisa X ku sheegay in haddii warbixinnadaasi sax yihiin, ay noqon doonto “dambi caalami ah oo cusub oo uu geystay Benjamin Netanyahu.” Waxa kale oo uu ku dhawaaqay in “heshiiska ganacsiga xorta ah ee Colombia iyo Israa’iil si degdeg ah loo burinayo.”.
Inkasta oo Petro uu horey u jaray xiriirka diblomaasiyadeed oo rasmi ah oo uu la lahaa Israa’iil bishii May 2024, hadalkiisa cusub wuxuu ka sii fogyahay tallaabadaas, isagoo ku amray wixii wakiillo diblomaasiyadeed ee haray inay si degdeg ah uga baxaan dhulka Colombia.
Wuxuu sidoo kale sheegay in Wasaaradda Arrimaha Dibadda ee Colombia ay dacwo ka gudbin doonto arrintan, xitaa maxkamadaha Israa’iil, isagoo ku baaqay in qareenno caalami ah ay taageeraan kooxda sharci ee Colombia.
