Mar 02 (Jowhar) Ciidamadda Booliska ee magaalada Muqdsho ayaa xabsiga dhigay wariyaha caanka ah ee Cali Aadan Muumin, kaasoo xalay ku hoyday xabsi ciidan.
War qoraal ah oo booliska kasoo baxay ayaa lagu sheegay in Cali Aadan loo heysto Qal Qal galin Amni iyo aflagaado madaxeed, lana horgeyn doonno madaxkamad.
“Taariikh markii ay ahayd 01/03/2025, Ciidanka Boliiska Soomaaliyeed gaar ahaan Saldhigga Boliiska Xamar Weyne ayaa soo xiray Eedeysane Cali Adan Muumin oo ku eedeysan Qal Qal galin Amni iyo aflagaado madaxeed, Waxaana la horgeyndoonaa Maxkamadda awooda u leh” ayaa lagu yiri warka.
Wararka ayaa intaasi kusii daraya in wariye Cali Aadan Muumin xiliga la xirayay uu balamiyay taliyaha booliska gobolka Banaadir Macalin Mahdi, sidaasna uu ugu sheegay inuu xarig yahay marka uu u tagay, isagoo ku xiran saldhigha booliska Xamarweyne.
Si kastaba, Xildhibaano, siyaasiyiin iyo bahda warbaahinta ayaa wadajir u canbaareysay xarriga wariyahan, iyagoo dalbaday in dib xoriyadiisa loo siiyo.
