Oct 19 (Jowhar)-Ilaa 30 ka tirsan Al-Shabaab ayaa lagu dilay tiro intaasi ka badana waa ku dhaawacmeen howlgal Ciidanka Xoogga Dalka iyo kuwa deegaanka ay ka fuliyeen deegaanka Qaycad ee Koofurta Gobalka Mudug.
Howlgalkaan ayaa lagu bartilmaameedsaday Horjoogayaal iyo maleeshiyaad badan oo ay wateen, kadib markii la helay xogtooda, waxaana ka mid ah horjoogayaasha nafta la dhaafiyay:-
1-Horjooge Maxamed Bashiir Muuse oo Shabaab ugu yeeri jireen Mukhtaar, kaasi oo ahaa horjoogaha waxa ay ugu yeeraan Jabhadaha, una qaabilsanaa koofurta gobalka Mudug.
2-Horjooge Maadey Foodey oo isna ahaa horjoogaha maleeshiyaad Shabaab u diyaarinayeen inay ku dhibaateeyaan shacabka Gobalka Mudug.
In ka badan 40 Shabaab ah oo dhaawacyo ay ka soo gaareen howlgalkaan ayaa la geeyey deegaanno ku dhow-dhow magaalada Ceelbuur ee gobalka Galgaduud, kuwaas oo ay hadda u la’yihiin meel ay kula tacaalaan xaaladooda.
Howlgalladii ugu dambeeyay ee Ciidanka Xogga Dalka iyo Geesiyaasha dadka deegaanka ay ka sameeyeen Koofurta Gobalka Mudug ayaa gabi ahaanba waxaa lagu bur-buriyay Godad iyo Fariisimo muddo dheer Shabaab isku qarinayeen.
