Oct 31 (Jowhar)-War saxaafadeed ka soo baxay Madaxtooyada Jubbaland ayaa lagu shaaciyey sababihii ay uga baxday shirkii Madasha Wadatashiga Qaran, kaddib markii la isku mari waayey qodobo muhiim ah.
Jubbaland ayaa sheegtay in shirka ay u tagtay si ay doodeeda miiska wada hadalka uga soo bandhigi lahayd, iyadoo diiradda saareysa in doorashooyinka waqtigooda ku dhacaan, sugidda amniga iyo in dhammaan dowlad-goboleedyada laga qeybgeliyo shirka. Si kastaba ha ahaatee, Jubbaland waxay tilmaantay in soo jeedinteeda laga dhego adeegay, taasoo gabagabadii ku khasabtay inay shirka isaga baxdo.
Jubbaland ayaa caddeysay inay ka biyo-diidsan tahay soo-jeedinta Dowladda Federaalka ee muddo kordhinta kale ah. Jubbaland ayaa sheegtay inay taasi abuureyso hubanti la’aan ku saabsan waqtiga doorashooyinka, ayna sababi karto firaaq dastuuri ah. Sidoo kal Jubbaland ayaa tilmaantay in heshiisyadii hore aan waxba laga fulin, kuwaas oo tilmaamayay in doorashada Golaha Deegaanka la qabto Juun 2024, halka doorashada Baarlamaanka iyo Madaxtooyadana la qabto November 2024.
Jubbaland ayaa tilmaantay in ay doonaysay in maamulka Puntland iyo SSC laga qeybgeliyo madasha si loo gaaro go’aano mideysan oo ku saabsan doorashooyinka, balse isku daygaas wax natiijo ah kama dhalan.
Gabagabadii, Jubbaland ayaa shaacisay in ay go’aansatay inay si madax-bannaan u qabsato doorashooyinkeeda, iyadoo caddeysay in Guddiga Madaxa Banaan ee Xuduudaha iyo Doorashooyinka Jubbaland ayaa xaq u leeyihiin qabashada doorashooyinka golayaasha deegaanka, Baarlamaanka iyo Madaxtooyada.
