Apr 20 (Jowhar)-Libaax ayaa ku dilay gabar 14 jir ah meel ku dhow magaalada caasimadda ah ee Nairobi, sida ay sheegtay hay’adda adeegga duurjoogta Kenya ee magaceeda loo soo gaabiyo KWS.
Dhacdadan naxdinta leh ayaa shalay ka dhacday goob lagu xanaaneeyo oo ku taal koonfurta magaalada Nairobi ee dalka Kenya.
Weerarka ayaa waxaa arkay wiil kale oo dhalinyaro ah, kaasi oo isla markiiba ku wargeliyay maamulka, sida ay ku warameen KWS.
“Kooxaha ilaalada ee KWS iyo kooxaha ka jawaabaya ayaa si degdeg ah loo abaabulay waxayna raaceen qul-qulatooyin dhiig ah ilaa webiga Mbagathi, halkaas oo meydka gabadha laga helay dhaawacyo ka soo gaaray dhabarka hoose,” ayay tiri hay’adda ilaalinta.
Dabin ayaa loo dhigay libaaxa, waxaana loo diray kooxo si ay goobta u baadhaan, iyadoo ay barbar socoto tillaabooyin badbaado oo la xoojiyay.
Intaa waxaa dheer, KWS waxay xustay in nin 54 jir ah uu maroodi ku dilay gobolka Nyeri, Kenya, Jimcihii.
“KWS waxay tacsi tiiraanyo leh u direysaa qoysaska murugeysan waxayna weli ka go’an tahay inay la shaqeyso sharci fulinta deegaanka iyo bulshada si loo wanaajiyo badbaadada shaqsiyaadka ku nool agagaarka aagagga duurjoogta ah ee la ilaaliyo,” ayaa lagu yiri bayaanka.
Wakaaladdu waxay ku baaqday in la kordhiyo maalgashiga “iska-hortagga iskahorimaadyada aadanaha iyo duur-joogta,” oo ay ku jiraan samaynta hababka digniinta ugu horayso iyo kobcinta wada-shaqeyn ballaaran oo lala yeesho bulshooyinka ay saamaysay.
