Feb 03(Jowhar) Madaxweyne Xasan Sheekh ayaa xeer Madaxweyne ugu soo celiyay xuquuqdii iyo darajadii ciidan ee uu lahaa G/sare Ibraahim Macalin Cabdullaahi oo horay usoo noqday Taliyaha Nabadsugida Gobolka Banaadir.
G/sare Ibraahim Macalin ayaa dhammaan xuquuqdii iyo darajadii uu lahaa laga xayuubiyay xilligii uu Fahad Yaasiin uu hayay xilka Agaasimaha Hey’adda Sirdoonka iyo Nabadsugida Qaranka.
Madaxweynaha ayaa ku saleeyey Xeerkan Madaxweyne, sharciga dhismaha Hay’adda Sirdoonka iyo Nabad-sugidda Qaranka ee Lr. 003, soona baxay sanadkii 2023-dii, codsi uu soo gudbiyey Gaashaanle Sare Ibraahim Macallin Cabdullaahi iyo muhiimadda ay leedahay in dib loo soo celiyo xuquuqdiisa iyo darajooyinkiisa ciidan si waafaqsan dastuurka iyo sharciyada dalka.
“Gaashaanle Sare Ibraahim, laga bilaabo maanta oo la saxiixay xeerkan Madaxweyne, waxa uu xaq u yeelanayaa dhammaan xuquuqda ciidan ee sharcigu uu u ogolyahay, iyadoo xeerkani uu baab’inayo dhammaan wixii xeer ah oo ka horreeyey”ayaa lagu yiri war saxaafadeedka Villa Somalia.
