Jan 04 ( Jowhar) Saddex ruux oo laba kamid ah ay Dumar yihiin ayaa ku geeritooday shil gaari oo xalay fiidkii hore ka dhacay inta u dhexeysa wadada xiriirisa magaalada Muqdisho iyo deegaanka Jazeera.
Shilka ayaa la sheegay inuu yimid kadib markii uu wadada ka dhacay gaari nooca raaxada ah oo ay saarnaayeen saddexdan ruux ee geeritootay, wuxuuna xiligaasi tartan kula jiray gaari kale.
Dad goob joogayaal ah ayaa ku warramay ineysan jirin cid ka badbaaday gaariga shilka galay oo gabi ahaantiisaba uu burburay.
Darawalka gaariga waday ayaa la sheegay inuu ka tirsan yahay ciidankii lagu soo tababaray dalka Eritrea ee dib loogu soo celiyay magaalada Muqdisho.
Maalinka Jimcaha dhalinyaro fara badan ayaa u dalxiis iyo dabaal tagta xeebta Jazeera, halkaasoo ay waqti kula soo qaataan ehel iyo asxaabtooda balse marka dib loosoo laabanaya ayey dhalinyarada qaar xawaare sare ku kaxeeyaan gawaarida, taasoo halis keenta.
