Shariif Sheekh Axmed oo ku baaqay in si dhab ah loo baaro dilka taliye Nuur Fareey
Apr 05( Jowhar) Madaxweynihii hore ee Soomaaliya Shariif Sheekh Axmed ayaa ka tacsiyeeyey geerida Taliyihii Guutada 14-October ee ciidanka xoogga dalka Gaashaanle sare Nuur Fareey oo lagu dilay duleedka degmada Afgooye ee gobolka Shabeelaha Hoose.
Wuxuu ku sifeeyey marxuumku inuu ahaa Geesi dadka iyo dalka si hagar la’aan ah ugu adeegay lahaana hibo hogaamineed oo ciidanka ah.
Taliska ciidanka xoogga dalka iyo Madaxda dowladda ayuu ugu baaqay in baaritaan deg deg ah oo waliba daah-furan lagu sameeyey kiiska dilka ah ee Taliyihii Guutada 14-October Gaashaanle sare Nuur Maxamed Gaaboow (Nuur Farey).
“Taliska ciidanka xoogga dalka iyo madaxda dowladda Federaalka ah waxaan ugu baaqayaa in baaritaan deg deg ah oo daahfuran lagu sameeyo falkaan gurracan si cadaaladda loo horkeenno dambiilayaasha soo abaabulay.” Ayuu yiri Shariif Sheekh Axmed.
Si kastaba, dilka sarkaalkan waxaa la sheegay inuu ka danbeeyay askari ka tirsan ciidankan 14-ka October, kaasoo dhibic laga saaray mishaarka shaqo xumi darteed, sida warbaahinta gudaha au tabisay.