Nov 11 (Jowhar)-Taliyaha guud ee ciidamada qalabka sida ee Sacuudiga Fayyad al-Ruwaili ayaa lagu wadaa in uu booqdo Tehran si uu wadahadal ula yeesho dhiggiisa Iran oo ku saabsan iskaashiga dhanka difaaca, sida uu sheegay taliska guud ee ciidamada qalabka sida ee Iran oo loo sii marinayo warbaahinta dowladda.
Booqashadan ayaa ku soo beegantay iyadoo Donald Trump uu ku guuleystay doorashadii dalkaasi ka dhacday, isagoo isu diyaarinaya inuu billaabo doorashadiisa labaad ee madaxtinimada Mareykanka bisha Janaayo, xilligaasoo uu ballan qaaday inuu horumarin doono nabadda Bariga Dhexe.
Intii lagu guda jiray muddadiisii ugu horreysay, Mr. Trump waxa uu fududeeyay heshiisyada caadiga ah ee u dhexeeya waddamada Carabta iyo Israa’iil, oo ah cadawga gobolka koowaad ee Iran, hindise loo yaqaan heshiiskii Abraham.
Inkasta oo Sucuudigu aanu wali si rasmi ah u xidhiidhin Israa’iil, haddana ilo-wareedyo u dhuun daloola wada-hadallada ayaa wakaaladda wararka ee Reuters u sheegay in wiilka uu soddogga u yahay Mr. Trump, Jared Kushner, uu kala hadlay dhaxal-sugaha Sucuudiga Amiir Maxamed Bin Salmaan oo ku saabsan xidhiidhka suurtagalka ah dhawrkii sano ee la soo dhaafay. .
Intaa waxaa dheer, warbaahinta dowladda ayaa sheegtay in Bagheri uu wada hadal dhanka taleefoonka ah la yeeshay Wasiirka Difaaca Sacuudiga Amiir Khalid bin Salman Al Saud sanadkii hore si ay dib u eegis ugu sameeyaan horumarka gobolka iyo kor u qaadista iskaashiga difaaca ee labada dal.
Bishii Maarso 2023, Tehran iyo Riyadh waxay gaareen heshiis, dhex dhexaadinta Shiinaha, si loo soo celiyo xiriirkii diblomaasiyadeed ee ka dib toddoba sano oo xiisad ah oo khatar gelisay xasilloonida iyo amniga Khaliijka oo sii hurisay colaadaha Bariga Dhexe oo dhan, Yemen ilaa Suuriya.
