Taliyayaasha booliska Kaaraan iyo C/casiis oo ku dhaawacmay dagaal ka dhacay Muqdisho
Feb 11(Jowhar) Warar dheeraad ah ayaa laga helayaa dagaal ka dhacay degmada Cabdicasiis ee gobolka Banaadir.
Dagaalka ayaa la sheegay inuu u dhexeyey ciidamada amaanka ee dowladda iyo rag hubaysan oo uu hoggaaminayey nin ka tirsan ciidanka Booliska.
Dagaalka ayaa ka bilowday guri ku yaalla Waaxda Neero ee degmada Cabdicasiis dhanka xigta Mirinaayo kaasi oo la isku haystay Maxkamadduna amartay inaan la dhisikarin balse dhisme lagu bilaabay amarka Maxkamadda kadib.
Ciidamo boolis ah ayaa tagay guriga si ay u joojiyaan dhismaha waxaana sidaas ku bilowday dagaalka.
Wararka ayaa sheegaya in dhaawacyo ay soo gaareen Taliyayaasha saldhigyada Booliska ee degmooyinka Cabdicasiis iyo Kaaraan.
Saraakiil ka tirsan Hay’adaha amaanka ee dowladda ayaa gaaray goobta iska hor imaadku uu ka dhacay waxaana ugu dambeyn ay ciidanku ku guuleysteen inay gacanta ku dhigaan 2-ruux oo ka mid ah raggii hubeysnaa inkasta oo uu baxsaday ninka la sheegay inuu booliska ka tirsanyahay ee ciidanka la dagaalamay.
Xaaladda ayaa hadda daggan waxaana Guriga la wareegay ciidamada amaanka.