Sep 18 ( Jowhar)- Turkiga ayaa qorsheyna in ay xeebaha Soomaaliya ay u dirto markab dagaal oo ay leeyihiin ciidanka badda, si ay u ilaaliyaan markab ka shaqeeynaya howlaha sahanka iyo cilmi-baarista tamarta oo lagu wado in bisha soo socota uu gaaro biyaha Soomaaliya.
Wasiirka Tamarta ee Turkiga Alparslan Bayraktar, ayaa todobaadkii hore u sheegay warbaahinta Turkiga, in Turkiga uu ruqsad u heysto in uu shidaal ka soo saaro saddex goobood oo ku yaalla badda Soomaaliya, mid kastana ay tahay 5,000 oo KM oo isku wareeg ah.
Bayraktar waxa uu intaa ku daray in Oruc Reis uu samayn doono daraasad seismic 3D aagga, taas oo aan weligeed hore loo samayn.
Bayraktar waxa uu sheegay in xogta hore ay muujinayso in markabka cilmi-baadhistu ay u badan tahay in uu shidaal ka helo goobaha la doortay. Markabka ayaa la geyn doonaa badaha Soomaaliya laga bilaabo Oktoobar.
Sida ku cad heshiiska ay kala saxiixdeen Turkiga iyo Soomaaliya horraantii sanadkan, Ankara waxaa loo oggolaaday inay ka ilaaliso biyaha Soomaaliya khataraha dibadda, iyo sidoo kale inay siiso xuquuq ay ku sahamiso iyo qodista ilaha tamarta ee aagga dhaqaalaha gaarka ah ee Soomaaliya.
Sida ay wararku sheegayaan Ankara ay qorshaynayso in ay geyso laba markab iyo markab gargaar oo dheeraad ah si loo sugo aagga.
Tunc Demirtas, oo ah falanqeeye arrimaha Afrika oo ka tirsan xarunta cilmi-baarista ee Seta, ayaa sheegay in Ankara ay si taxadar leh u ilaalinayso markabka, sababtoo ah wuxuu ka shaqeyn doonaa badweynta furan.
“Tani waa markii ugu horreysay oo markab cilmi-baaris oo Turki ah uu ka howlgalo badda,” ayuu u sheegay Middle East Eye. “Markabka waa in laga ilaaliyaa budhcad-badeedda iyo sidoo kale khataraha dhulka ku salaysan ee suurtogalka ah.” ayuu yiri Demirtas,
Wuxuu intaas ku daray in haddii ay suurtogal tahay in laga helo Soomaaliya, in shidaalka ku jira gobolka lala wadaagi doono dawladda Soomaaliya iyada oo laga duulayo heshiiska wax-soo-saarka.
“Kadib marka la siiyo xuquuqaha gobolka ee ay u baahan yihiin si ay u helaan, ilaa inta aad shidaal haysato, waxaad ku iibin kartaa meel kasta oo adduunka ah,” ayuu yiri.
“Waxaan keeni karnaa wershadaha sifaynta ee dalkeena. Sidaa darteed, waxa suurtogal noqon doonta in si degdeg ah loo iib geeyo dhaqaalahana laga sameeyo”ayuu sii raaciyay wasiirka tamarta dalka Turkiga.
Turkiga iyo Soomaaliya ayaa bishii Febraayo kala saxiixday heshiis iskaashi oo dhanka difaaca iyo dhaqaalaha ah, kaas oo looga gol leeyahay in lagu xoojiyo awoodda difaaca badda Soomaaliya.
Bishii Maarso, Turkiga iyo Soomaaliya ayaa sidoo kale qalinka ku duugay heshiis shidaal baaris ah si dowladda Turkiga loogu ogolaado inay ka shaqeyso xeebaha Soomaaliya.
