Aug 22(Jowhar)-Dagaal u dhaxeeya ciidamada daraawiishta maamulka Koonfur Galbeed iyo ciidamo kale oo Macawisley ah oo ku sugan deegaanka Yaaqbariweyne ee hoostaga degmada Wanlaweyn ee gobolka Shabeelaha Hoose ayaa sababay qasaare isugu jira dhimasho iyo dhaawac.
Wararka ayaa waxa ay sheegayaan in Ciidamada Maamulka Koofurgalbeed ay weerar ku qaadeen maleeshiyo macawisley ah oo ku sugnaa YaaqBariweyne.
Xildhibaan Daahir Amiin Jeesow ayaa ku eedeeyay ciidamada maamulka Koonfur Galbeed in weerar qabiileysan ku qaadeen deegaanka Yaaqbariweyne, waxa uuna xusay in ciidanka macawisleyda deegaanka iska difaacayaan weerarka lagu soo qaaday.
Waxa uu sheegay Xildhibaan Daahir Amiin Jeesow inay qasaare gaarsiiyeen ciidamada Koofurgalbeed ee soo weeraray deegaanka Yaaqbariweyne.
Maalmihii la soo dhaafay ayaa waxaa warbaahinta gaar ahaan baraha bulshada ay isu marinayeen saraakiil ka soo jeeda Beesha Gaaljecel iyo Maamulka Koofurgalbeed eedeeyn uu dhinac walba dhinaca kale u jeedinayo.
