Rooble;Golaha Wadatashiga waxa uu yeelanayaa kulan la xiriira sidii loo sixi lahaa doorashooyinka

Xafiiska Ra’iisul Wasaaraha ayaa war saxaafadeed ka soo saaray kulan uu maanta la yeeshay Ra’iisul Wasaare Rooble xubnaha Midowga Musharaxiinta kaasoo loogaga hadlay arrimaha doorashooyinka dalka.

War Saxaafadeedka ayaa lagu sheegay in ra’iisul wasaaraha uu kulamo la yeelan doono golaha wadatashiga iyo weliba guddiyada doorashooyinka si ay u noqdaan doorashooyinka kuwa daahfuran oo ku dhaca si cadaalad ah.

Halkan hoose ka aqriso war saxaafadeedka ka soo baxay Xafiiska ra’iisul wasaaraha;

War Saxaafadeed : 28/11/2021

Ra’iisul Wasaaraha Xukuumadda Federaalka Soomaaliya.

Kulan ay maanta isugu yimaadeen Ra’iisul Wasaaraha XFS iyo Xubnaha Midowga Musharaxiinta ayaa wax ay uga wada hadleen arimaha doorashooyinka dalka .

Midowga Musharaxiinta ayaa walaac weyn ka muujiyay daahfurnaan la’aanta ka jirta doorashooyinka dalka ka soconaya iyo sida aaney raali uga noqon karin habka ay iminka wax u socdaan.

Ra’iisul Wasaaraha ayaa Madaxda Musharaxiinta uga warbixiyay dadaalkiisa joogtada ah ee la xariira xaqiijinta hufnaanta doorashada waxa uuna la wadaagay inuu faray Guddiyada doorashada in ay waajiboodkooda u gutaan si waafaqsan habraacyadii lagu hishiiyay ee doorashooyinka.

Ra’iisul Wasaaraha isaga oo tixgalinaya tabashooyinka la xiriira daahfurnaanta doorashooyinka ee ay muujiyeen Midowga Musharaxiinta ,dareenka shacabka Soomaaliyeed iyo Bulshada Caalamka ayaa waxa uu ballan qaaday in Gollaha Wadatashiga Qaranka uu yeelan doono kulan ku saabsan sidii si wadajir ah looga shaqeyn lahaa in doorashooyinka dalku ay u dhacaan si hufan loona saxi lahaa qaladaadka jira.

Ra’iisul Wasaaraha ayaa sheegay in Guddiyada Doorashooyinka heer Dowlad Goboleed iyo heer Federaal uu u qabanayo sidoo kale shir foogaan arag ah kaas oo lagaga hadlaayo daahfurnaata doorashada isaga oo caddeeyay in lala xisabtamaayo cid kasta oo ku xadgudubta hufnaanta doorashada.

This website uses cookies to improve your experience. We'll assume you're ok with this, but you can opt-out if you wish. Accept Read More