WHO;”Amarka ka bixitaanka Qaza ku tilmaantay Xukun Dil ah oo lagu ridey dadka xanuunsan”

Oct 13 (Jowhar.com)-Ururka Caafimaadka Adduunka WHO ayaa ka digay amarka ay Israa’iil ku soo rogtay dadka ku noolmagaalada Qaza ee ah in 24saac gudahood ay uga guuraan iyadoo ku tilmaantay inuu la mid yahay amarkaas xukun dil ahoo lagu ridey dadka dhaawacyada qaba iyo kuwa xanuunsan ee ku jira isbitaalada magaalada Qaza.

Afhayeenka WHO Tarik Jasarevic ayaa sheegay in mas’uuliyiinta caafimaadka ee Gaza ay ku taliyeen in aysan suurtagal ahayn in bukaannada cisbitaalka ee nugul laga saaro 24 saacadood gudahood sida uu amray militariga Israa’iil.

“Waxaa jira dad aad u xanuunsan oo dhaawacyadoodu ay ka dhigan tahay in rajadooda kaliya ee ay ku badbaadaan ay tahay taageerada nolosha, sida qalabka lagu neefsado oo ay ka helaan isbitaalada,” ayuu yiri Jasarevic.

“Marka dadkaas la raro waa xukun dil ah. Weydiinta shaqaalaha caafimaadka inay sidaas sameeyaan waa wax ka baxsan naxariista.”ayuu sii raaciyay.

Milatariga Israel ayaa shalay amar ku bixiyay 1.1 milyan oo Falastiiniyiin ah oo ku nool Gaza inay u guuraan koonfurta 24 saacadood gudahood ka hor duulaan la filayo in dhinaca dhulka ah ay ciidamad Israa’il ku qaadaan magaalada Qaza.

Qaramada Midoobay ayaa ka digtay in raritaan dad badan ay tahay wax aan macquul ahayn oo ay ka dhalan karto cawaaqib xun.

Diblomaasi sare oo ka tirsan Midowga Yurub Josep Borrell ayaa ku tilmaamay awaamiirta Israa’iil mid gabi ahaanba aan macquul ahayn.

Xamaas, oo maamusha marinka Qaza, ayaa u sheegtay dadka deegaanka inay iska dhega tiraan amarka Israel, oo ay ku tilmaameen dacaayad been abuur ah.

Jasarevic wuxuu sheegay in isbitaallada ay haystaan ​​saacado yar oo koronto ah maalin kasta laguna qasbayo inay ku tiirsanaadaan koronto-dhaliyeyaasha si ay u qabtaan howlaha muhiimka ah, iyadoo bukaannada ku jira qaybaha daryeelka degdegga ah iyo kuwa dhawaan dhashay ay ka mid yihiin kuwa ugu nugul.

Boqolaal qoys ayaa bilaabay inay ka tagaan magaalada Qaza waxaana la arkayay boqollaal baabuur, mootooyin iyo kuwa xamuulka qaada, oo si aad ah u raran alaab,sidoo kale qaar ka mid ah dadka ayaa ku safray lo’, geel, ido iyo dameero.

Ciidamada Israa’iil ayaa waraaqo ka soo daadiyay hawada sare ee magaalada Gaza.
Turkiga ayaa dhalleeceeyay amarka daadgureynta Israa’iil, wuxuuna ku tilmaamay “mid aan gabi ahaanba la aqbali karin” wuxuuna sheegay in ay tahay in laga laabto.

War qoraal ah oo ay soo saartay wasaaradda arrimaha dibadda ayaa ku qortay: “In 2.5 milyan oo qof oo reer Gaza ah – oo maalmo lagu hayay duqaymo aan loo meel dayin oo koronto, biyo iyo cunto laga reebay – inay u haajiraan meel aad u xaddidan waa xadgudub cad. ee sharciga caalamiga ah oo aan meelna ku lahayn bini’aadminimada.”

“Waxaan filaynaa in Israa’iil ay si degdeg ah u beddesho khaladkan weyn oo ay si degdeg ah u joojiso naxariis-darrada ay ku hayso dadka rayidka ah ee Gaza”.

Dhinaca kale Ciidanka Israa’iil ayaa diiday eedaymaha ah inay u adeegsadeen fosfooraska cad hawlahooda milatari usbuucii la soo dhaafay, iyaga oo ku tilmaamay kuwa been abuur ah.

Diidmada ayaa timid ka dib markii Human Rights Watch ay Khamiistii ku eedeysay Israa’iil inay u isticmaashay fosfooraska cad ee Gaza iyo Lubnaan, taas oo halis weyn gelisay dadka rayidka ah, ka dib markii la daawaday muuqaalkii dagaalka

Wasaarada Caafimaadka Qaza ayaa sheegtay in tirada dadka ku dhintey duqeynta Isra’il ay gaartay 1,799 ruux halka dhaawacana uu kor u dhaafay 6,388.

Tirada dadka ku dhintey weerarka Xamaas ay ku qaaday Isra’il ayaa gaartay 1,300 halka ay ku dhaawacmeen 3,400.