Aug 25(Jowhar)-Madaxweyne ku xigeenka Tanzania Emmanuel Nchimbi ayaa ku dhawaaqay inuu iscasilayo oo uu ka fariisan doono siyaasada dhammaadka toddobaadka soo socda wax ka yar 10 bilood ka dib markii loo dhaariyay xilka Madaxweyne ku xigeenka dalka Tanzania.
54-jirkan ayaa faahfaahinta ku sheegay warqad kooban oo uu u diray Madaxweyne Samia Suluhu Hassan oo uu ku wadaagay bartiisa Instagram-ka. Ilo wareedyo xafiiskiisa iyo madaxtooyada ayaa sidoo kale xaqiijiyay iscasilaadda.
Nchimbi, oo noqon doona madaxweyne ku xigeenkii ugu horreeyay ee xilka ka dega tan iyo markii ay Tanzania xornimada qaadatay 1964, ayaa sharraxay inuu iscasilay isagoo raacaya ballanqaad uu u sameeyay madaxweynaha oo ahaa inuu xilka ka degi doono haddii ay dareento in loo baahan yahay madaxweyne ku xigeen kale.
Iscasilaadda ayaa timid iyadoo ay jiraan warar warbaahintu ay sheegayso in Samia iyo ku xigeenkeeda uu khilaaf soo kala dhex galay.
Xisbiyada mucaaradka iyo kooxaha xuquuqda aadanaha ayaa ku eedeeyay ciidamada amniga inay si arxan darro ah u weerareen dibadbaxayaasha ka soo horjeeda dowladda.
“Shaki la’aan waxaan ku qancay in madaxweynuhu uu doonayo isbeddello, sidaas darteedna waxaan go’aansaday inaan fuliyo ballanqaadkayga,” Nchimbi ayaa ku qoray warqaddiisa iscasilaadda isagoo tixraacaya ballanqaadkii uu u sameeyay Samia.
Wuxuu u mahadceliyay madaxweynaha iyo xisbiga talada haya ee Chama Cha Mapinduzi (CCM) kalsoonida ay siiyeen, iyo dadka reer Tanzania taageeradooda intii uu ku jiray adeegga dadweynaha.
