Nov 15(Jowhar)-Madaxweynaha Suuriya, Axmed al-Sharaa, ayaa maanta booqasho ku tagaya dalka Ruushka si uu ula kulmo Madaxweynaha Ruushka Vladimir Putin, sida ay ku warrantay wakaaladda wararka dowladda Suuriya (SANA).
Booqashadan ayaa qeyb ka ah dadaal diblomaasiyadeed oo ballaaran oo lagu doonayo in lagu xoojiyo sharciyadda caalamiga ah ee dowladda kala-guurka ah ee Dimishiq.
Tani waxay noqon doontaa booqashadii ugu horreysay ee rasmi ah ee al-Sharaa uu ku tago Moscow, oo muddo dheer ahayd saaxiib dhow oo maamulkii hore ee Bashaar al-Asad, kaas oo xoogagga al-Sharaa ay xilka ka tureen bishii Diseembar.
Inta lagu jiro booqashada, al-Sharaa iyo Putin ayaa ka wada hadli doona “horumarka gobolka iyo arrimaha caalamiga ah” iyo sidoo kale “sida loo xoojin karo iskaashiga labada dal,” sida ay SANA ku sheegtay warkeeda, iyadoo soo xiganeysa xafiiska warfaafinta madaxtooyada. Xogta ayaa sidoo kale sheegaysa in al-Sharaa uu la kulmi doono shacabka Suuriya ee ku nool dalka Ruushka.
Wakaaladda wararka ee Reuters ayaa soo xigatay sarkaal Suuriyaan ah oo sheegay in al-Sharaa uu la yeelan doono wadahadallo ku saabsan joogitaanka saldhigga badda ee Ruushka ee Tartous iyo saldhigga cirka ee Khmeimim. Sarkaalkaasi ayaa intaas ku daray in al-Sharaa uu qorsheynayo inuu si rasmi ah uga codsado Moscow in ay usoo gacan galiyaan Bashaar al-Asad, kaas oo isaga iyo qoyskiisu ku nool yihiin masaafuris magaalada Moscow tan iyo markii uu dalka ka cararay bishii Diseembar.
Al-Sharaa, oo hore u hoggaamin jiray laanta Suuriya ee al-Qaacida isagoo sita magaca Abuu Maxamed al-Julaani, ayaa ahaa hoggaamiyihii kacdoonkii xoogagga mucaaradka ee qabsaday magaalada Dimishiq sanadkii hore, isagoo meesha ka saaray xukunkii tobannaanka sano ee Bashaar al-Asad.
Tan iyo markaas, Ruushka ayaa dadaal ugu jiray inuu dhiso xiriir cusub oo xooggan oo uu la yeesho hoggaanka cusub ee Suuriya, iyadoo uu taageero diblomaasiyadeed u muujinayo Dimishiq, gaar ahaan marka la eego duqeymaha Israa’iil ay ku qaaddo gudaha Suuriya.
SANA ayaa sheegtay in Putin uu bishii Febraayo la hadlay al-Sharaa, isagoo muujiyey taageero uu u hayo “midnimada, madaxbannaanida iyo xasilloonida” Suuriya. Bishii Luulyo, Putin iyo Wasiirka Arrimaha Dibadda ee Ruushka Sergey Lavrov ayaa Moscow kula kulmay Wasiirka Arrimaha Dibadda ee Suuriya, Asaad al-Shibaani.
Booqashada madaxweynaha Suuriya ee Moscow ayaa ku soo aadeysa kadib safarkiisii uu bishii Sebteembar ku tegay magaalada New York, halkaas oo uu khudbad ka jeediyey shirweynihii guud ee Qaramada Midoobay (UNGA), isagoo ku dhawaaqay in Suuriya ay “dib u hananayso kaalinteedii saxda ahayd ee bulshada caalamka,” isla markaana uu ku baaqay in la joojiyo cunaqabataynta lagu hayo.
