Donald Trump ayaa si qarsoodi ah isugu beddelay diyaarado markii uu ka baxayay shir madaxeedkii Nato ee ka dhacay Turkiga bishii hore, taasoo ahayd xeelad uu ugaga dhuumanayay hanjabaada Iraan ee ka dhanka ah Madaxweyne Trump.
Madaxweynaha Mareykanka ayaa raacay Air Force One iyadoo si toos ah kamaradaha telefishanka ay u duubayaan balse si qarsoodi ah ayaa loo saaray gaari kuwa raashinka u geeya diyaarada ah kadibna waxaa uu raacay diyaarad milatari, sida ay sheegtay Washington Post.
Saxafiyiinta iyo qaar ka mid ah shaqaalaha Aqalka Cad ee saarnaa diyaaradda ma aysan ogeyn in si qarsoodi ah looga dejiyay Trump diyaarada.
Mareykanku ayaa ogaaday hanjabaada Iiraan inay dhab noqon karto maadaama gantaalada ay haysato ay gaari karaan dalka Turkiga oo deris la ah. Si kasta ha ahaatee warkan maysan xaqiijin Aqalka Cad.
Trump ayaa hore u sheegay inuu yahay bartilmaameedka koowaad ee Iiraan intii lagu jiray shir madaxeedkii Ankara.
Dhacdada ayaa timid maalin ka dib markii Mareykanku uu dib u cusbooneysiiyay weerarrada milatari ee Iiraan ka dib markii uu burburay wadahadalladii u dhexeeyay Washington iyo Tehran si loo soo afjaro dagaalka.
Trump ayaa Turkiga yimid isagoo wata Boeing 747-8 cusub oo ay Qatar ku deeqday, laakiin wuxuu ku dhawaaqay inuu ku bixi doono Air Force One marka uu laabanayo.
8-dii Luulyo, muuqaallo ayaa muujinayay isagoo raacaya diyaaradda madaxweynaha garoonka diyaaradaha ee Ankara.
Laakiin sida laga soo xigtay Washington Post, ka dib si qarsoodi ah ayaa loogu qaaday diyaarad milatari oo yar oo C-32A ah – oo ah Boeing 757 oo la beddelay oo inta badan uu isticmaalo madaxweyne ku xigeenka – iyadoo loo marayo gaari cuntada lagu kariyo oo kor loogu qaaday heerka diyaaradda dhinaca ka soo horjeeda meeshii uu ka raacay.
Xoghayaha Difaaca Pete Hegseth ayaa si gaar ah u fuulay C-32A isagoo adeegsanaya jaranjaro dibadda ah si uu duulimaadku u noqdo mid caadi ah, sida laga soo xigtay wargeysku.
Wariyeyaasha iyo qaar ka mid ah shaqaalaha Aqalka Cad ayaa fuulay Air Force One waxaana loo sheegay inay xiraan daaqadahooda. Ma aysan ogeyn in madaxweynuhu uusan saarneyn diyaaradda.
Kadib Trump waxay diyaaradii geysay UK isagoo ku sii jeeday Mareykanka, halkaas oo ka soo degey diyaaradii hore dibna u raacay diyaarada Air Force One-kii hore iyadoo aysan cidna ogaan.
Waxaana la arkay isagoo ka soo degaya diyaaradda ka dib markii ay ku degtay RAF Mildenhall. Lama oga sida uu uga soo degey diyaaradii uu sida qarsoodiga ah uag soo raacay Turkiga ee C-32A.
Intii uu socday duulimaadkaas, Trump wuxuu la hadlay wariyeyaasha diyaaradda saarnaa halkaas oo uu ku xusay hanjabaadaha Iiraan laakiin ma uusan xusin isbeddelka diyaaradda ee hore.
Wuxuu sheegay inuu halis ku qabay mar walba noloshiisa, iyo inuu yahay lambarka koowaad ee liiska Iiraan.
Agaasimaha isgaarsiinta Aqalka Cad Steven Cheung si toos ah uma xaqiijin ama uma beenin wararkaas, laakiin wuxuu sheegay in Air Force One cusub ay ahayd diyaarad casri ah oo ku rakiban tallaabooyin amni si loo ilaaliyo madaxweynaha iyo shaqaalihiisa.
Sirdoonka Mareykanka ayaa hore uga digay hanjabaad gaar ah oo weerar ah oo lagu qaado Trump ama diyaaradihiisa, sida lagu sheegay warbixin hore oo ay qortay CBS News.
Wargeyska New York Times ayaa hore uga warbixiyay walaacyada amniga ee ku saabsan diyaaradda hibada leh ee Qatar, oo ay ku jirto in Hay’adda Sirdoonka uu ku boorriyay Trump inuu beddelo diyaaradaha marka uu ka soo laabto shir madaxeedka Nato.
Mareykanka ayaa bilo badan ku bixiyay dib-u-habeynta diyaaradda Boeing 747-8, oo qiimaheedu yahay $400 milyan, si loogu diyaariyo madaxweynaha.
Diyaaradihii hore ee Air Force One ayaa leh tiknoolajiyadda laysarka (laser) oo indho-tiri karta gantaallada soo socda, sida ay ilo-wareedyo u sheegeen CBS News.
