Aug 13 (Jowhar)-Xoghayaha warfaafinta Aqalka Cad, Karoline Leavitt, ayaa xilkeeda ka degi doonta dhammaadka bishan, sida uu sheegay Madaxweynaha Mareykanka Donald Trump Arbacadii, iyadoo ay meesha ka baxeyso mid kamid ah lataliyeyaashi Trump ee aadka ugu dhawaa, xili ay soo dhow yihiin doorashooyinka dhexe ee Mareykanka ee bisha Nofeembar.
Leavitt waxay noqon doontaa la-taliye isgaarsiineed oo dibadda ah iyo hawlwadeen siyaasadeed, iyadoo gacan ka geysanaysa qaabaynta mustaqbalka dhaqdhaqaaqa Trump ee “Make America Great Again” (MAGA), sida ay iyada iyo Trump ku sheegeen bayaanno ay soo saareen.
Leavitt, oo 28 jir ah, ayaa qoraal ay baraha bulshada ku daabacday ku sheegtay, inay doonayso inay waqti badan la qaadato carruurteeda yaryar. Waxay bishii May dhashay gabar, oo ah ilmaheedii labaad, waxayna dhawaan ka soo laabatay fasaxii umusha.
“Karoline waxay Aqalka Cad ka ahayd hoggaamiye dhab ah, waxayna qabatay shaqo aad u wanaagsan oo ay ugu dagaallamaysay Caddaaladda, Xorriyadda iyo Madax-bannaanida tan iyo 2018, oo ay ku jirto ololaheennii taariikhiga ahaa ee dib-u-doorashada 2024,” ayuu Trump ku qoray baraha bulshada.
Tan iyo bilowgii sanadkan, waxaa xilalkooda laga qaaday shaqsiyaad xilal sare hayay, sida Xeer-ilaaliyihii hore Pam Bondi iyo Xoghayihii hore ee Amniga Gudaha Kristi Noem.
Saraakiil kale oo ay ku jiraan Xoghayihii hore ee Shaqada Lori Michelle Chavez-DeRemer iyo Todd Lyon, oo ah madaxa ku-meel-gaarka ah ee Hay’adda Socdaalka iyo Kastamka (ICE) ayaa iska casilay xilalkooda iyadoo ay jireen dhaliilo iyo baaritaanno ku saabsan qaab-hoggaamineedkooda.
Si kastaba ha ahaatee, bixitaanka Leavitt ayaa ku soo beegmay xilli ay ka soo laabatay fasaxii dhalmada. Iyada horraantii bishii Maajo umushay ilmihii labaad, oo ah gabar lagu magacaabo Viviana.
Haweeneydan oo 27 jir ah ayaa hakisay shaqadeedii afhayeenka saxaafadda ee Aqalka Cad dabayaaqadii bishii Abriil. Waxay dib ugu soo laabatay masraxa Aqalka Cad si ay u qabato kulankeedii ugu horreeyay ee rasmiga ah ee warbaahinta bartamihii bishii Luulyo.
