Aug 19 (Jowhar)- DXoghayaha Arrimaha Dibadda ee Mareykanka Marco Rubio ayaa kala hadlay La-taliyaha Amniga Qaranka ee Imaaraadka Carabta Sheikh Tahnoon bin Zayed Al Nahyan, arrimaha muhiimka ah ee amniga gobolka, sida uu sheegay Afhayeenka Wasaaradda Arrimaha Dibadda Tommy Pigott.
Labada mas’uul oo qadka taleefanka ku sheekeystey ayaa waxay ka wada hadleen xaaladda Lubnaan iyo dadaallada wadajirka ah ee socda si Iran iyo kooxaha wakiillada ah loola xisaabtamo weerarrada sii socda.
Madaxweynaha Mareykanka Donald Trump ayaa sheegay in wax wadahadal ah uusan ka dhacayn ama aan loo qorsheynayn Iiraan, isagoo ku adkeysanaya in xayiraadda badda ee Mareykanka ay weli si buuxda u socoto iyo in miinooyinka ku jira Marinka Hormuz la nadiifiyay.
Wasiirka Arrimaha Dibadda ee Iiraan Abbas Araghchi ayaa sheegay in Mareykanku uu hadda ka baryayo inuu ka gorgortamo xaaladaha Iiraan ka dib markii uu ku guuldareystay inuu ku qasbo Tehran inay is dhiibto.
Wasaaradda Difaaca ee Imaaraadka Carabta ayaa sheegtay in Iiraan ay laba gantaal oo ballistic ah ku soo riday, iyadoo mid ka mid ah uu ku dhacay biyaha Imaaraadka Carabta kan kalena uu ku dhacayo meel ka baxsan badda.
Dhinaca kale, Imaaraadka Carabta ayaa sheegay inuu hakisay dhammaan xiriirradii ganacsi iyo maaliyadeed ee ay la lahaayen Iran ilaa amar dambe, kaddib markii ay sii xoogeysatay xiisadda gobolka.
Wasaaradda Arrimaha Dibadda ee Imaaraadka ayaa sheegtay in go’aanka uu ka dhashay dagaalka sii kordhaya oo khatar ku ah nabadda iyo amniga gobolka iyo caalamkaba.
Saacado ka hor inta aan go’aanka la shaacin, Wasaaradda Difaaca Imaaraadka ayaa sheegtay inay ogaatay laba gantaal oo ballistic ah oo Iran laga soo tuuray oo ku wajahnaa Imaaraadka.
