Aug 10 (Jowhar)Madaxweyne Xasan Shiikh iyo Siyaasiyiinta Mucaaridka ayaa goordhaweyd galay shirkii afraad, ka dib saddex shir oo hore oo natiijo la’aan ku soo idlaaday.
Shirkii u danbeeyay, madaxweyne Xasan wuxuu dalbaday 20 cisho oo uu latashiyo lasoo sameeyo madaxda maamul goboleedyada ee isaga taageersan iyo xildhibaanada.
Labada dhinac ayaa isku-mari la’; wax-ka-beddelka dastuurka iyo doorashooyinka qof iyo cod ee gadhwadeenka ka tahay Villa Somalia; iyada oo mucaaridku doonayaan in laga laabto wax-ka-beddelka dastuurka qodobada doorashada, ayna doorashada dalku noqoto; mid heshiis lagu yahay, sida ay sheegeen.
DFS ayaa diwaangelinta doorashada tooska ah ka bilowday Koonfurgalbeed, Galmudug iyo Hirshabeelle; iyada oo qorshaynaysa in ay ka bilowdo maamulka Woqooyi-bari iyo Gobolka Gedo.
Puntland iyo Jubbaland ayaa iyagu qaadacay wax-ka-beddelka dastuurka iyo doorashooyinka tooska ah, waxayna ka dhur sugayaan in madasha mucaaridku ay isu soo dhoweyso dhinacyada.
