Sept 22 (Jowhar)- Iyadoo xaaladda dagaalka Yemen ay si xawli ah isku beddelayso, dagaalyahannada Xuutiyiinta ayaa ku dadaalaya inay qabsadaan goobo istiraatiiji ah oo dhul sare ah, iyagoo doonaya inay ka gooyaan xeebta Badda Cas dhulalka kale ee ay gacanta ku hayaan ciidamada ay taageerto Sacuudiga tallaabadan ayaa timid ka dib markii la soo sheegay in Madaxweynaha Mareykanka Donald Trump uu daqiiqaddii ugu dambaysay joojiyay duqeymo Mareykanku ku qaadi lahaa kooxdaas.
Xuutiyiinta oo ay taageerto Iran ayaa bishan sameeyay horumar degdeg ah oo ballaaran, taasoo colaadda Bariga Dhexe u soo wareejisay goob cusub, isla markaana sii kordhisay walaaca laga qabo sahayda tamarta ee caalamka.
Dhaxal-sugaha Sacuudiga, Maxamed bin Salmaan, ayaa dhowr jeer ku boorriyay Washington inay ku biirto dagaalka Yemen, balse Mareykanka ayaa ilaa hadda diiday codsiyadaas.
Maalintii Sabtida, Xuutiyiintu waxay sheegeen inay weerar ku qaadeen magaalada Riyaad, halkaas oo qaraxyo waaweyn ay xigeen tiirar qiiq ah oo laga arkayay meel u dhow garoonka diyaaradaha.
Sacuudiga ayaan wax faallo ah ka bixin wax u muuqday weerarkii ugu horreeyay ee lagu qaado caasimadda tan iyo markii uu dagaalku sii xoogeystay.
Wargeyska *New York Times* ayaa qoray in maamulka Trump uu diyaariyay inuu shalay duqeymo xagga cirka ah ku qaado Xuutiyiinta ka dib codsiyo cusub oo uga yimid dhaxal-sugaha Sacuudiga.
Balse wargeysku wuxuu sheegay in Mr. Trump uu joojiyay duqeymahaas daqiiqaddii ugu dambaysay, xilli ciidamadu ay diyaaradaha ku rarayeen bambooyin.
Taliska Dhexe ee Ciidamada Mareykanka (CENTCOM) ayaa su’aalaha u gudbiyay Aqalka Cad.
Aqalka Cad ayaan isla markiiba ka jawaabin iimayl lagu weydiinayay faallo ku saabsan arrintan.
Mr. Trump ayaa shalay la hadlay Rashid al-Alimi, oo ah madaxweynaha xukuumadda Yemen ee caalamku aqoonsan yahay isla markaana ay taageerto Sacuudiga, kaas oo ka codsaday caawimaad militari oo Mareykanka ka timaada, sida ay sheegeen afar il-wareed.
Labo ka mid ah il-wareedyadaas — mid u dhashay Yemen iyo mid reer Galbeed ah — ayaa sheegay in Mr. Trump uusan ballan-qaad toos ah oo ku saabsan taageero militari sameyn intii lagu guda jiray wada-hadalka.
