July 07 (Jowhar)-Dowlada Isutagga Imaaraadka Carabta ayaa saldhig militari ka dhisaya garoonka diyaaradaha Berbera, kaas oo ay isticmaali doonaan Mareykanka iyo Israel.
Wargeyska Faransiiska ah ee Le Monde ayaa daabacay in dhismaha saldhigan uu xoogeystey kadib markii Israel ay 26-kii December 2025 aqoonsatay Somaliland.
Sawirada dayax-gacmeedka ee uu dib u eegay wargeysku ayaa la sheegay inay muujinayaan dhismaha godad waaweyn oo dhulka hoostiisa mara oo ku yaal koonfurta waddada weyn.
Ilo wareed ka tirsan amniga Yurub oo ay soo xigatay Le Monde ayaa sheegay in godadka ay u muuqdaan inay yihiin xarumo kayd ah oo dhulka hoostiisa mara oo loo isticmaali karo rasaas ama shidaal.
Waxay intaas ku dartay in Israa’iil ay raadineyso joogitaan istaraatiiji ah oo u dhow Gacanka Cadan iyo Marinka Bab al-Mandab, oo u dhow meelaha ay ka shaqeeyaan dhaqdhaqaaqa Xuutiyiinta ee ay taageerto Iiraan.
Le Monde waxay xustay in goobta istaraatiijiyadda ah ee Berbera oo ku taal mid ka mid ah waddooyinka ganacsiga badda ee ugu mashquulka badan adduunka ay si weyn u kordhisay muhiimaddeeda juqraafiyeed, gaar ahaan iyadoo ay socdaan caqabadaha amniga Badda Cas iyo weerarrada Xuutiyiinta ee maraakiibta ganacsiga.
Ilaa hadda, Dowladda Somaliland iyo dowladaha Imaaraadka Carabta, Mareykanka, ama Israa’iil midkoodna si rasmi ah uma xaqiijin ama kama hadlin dhismaha la sheegay in lagu sameeynayo xarunta militariga.
Haddii la xaqiijiyo, saldhigga la sheegay wuxuu sii xoojin doonaa muhiimadda istaraatiijiyadeed ee Berbera oo ah xarun amni iyo saadka oo ku taal Badda Cas.
Khabiir militari oo uu xigtay Le Monde ayaa sheegay in shaqadaas uu fulinayo Imaaraadka Carabta, isla markaana ujeedadu tahay in la sameeyo keyd hub iyo agab militari. Shaqaale ka tirsan garoonka Berbera ayaa sidoo kale wargeyska u sheegay in Abu Dhabi ay shaqadan u qabaneyso danaha Israel iyo Mareykanka.
Imaaraadka Carabta ayaa sanadkii 2017 heshiis difaac la galay maamulka Somaliland, kaas oo qeyb ka ahaa isticmaalka militari ee garoonka Berbera. Tan iyo markaas, Abu Dhabi waxay xoojisay saameynteeda dhaqaale iyo mid amni ee Berbera, gaar ahaan dekedda oo ay maamusho shirkadda DP World ee Dubai.
Wargeyska ayaa intaas ku daray in Imaaraadka uu March 2025 Boosaaso geeyay radar ay Israel sameysay oo lagu magacaabo EL/M-2084, arrin muujineysa xiriirka amni ee sii kordhaya ee ka dhexeeya Abu Dhabi iyo Tel Aviv ee gobolka.
